काठमाडौं, चैत २५ । बितल जेठ १४ गते राति संविधानसभाके म्याद थपएलाबाद संसोधन कएलगेल कार्यतालिका अनुसार काम भेल करिब एकमहिनेमे जनता संविधानके मस्यौदा हातमे पाबि सकैत छल आ एखन प्राप्त सुझाव उपर सभासदसभ अन्तिम बिमर्श क सकैत छलाह ।
मुदा संविधानसभाके थपल म्याद ५० दिन मात्रे बाँकी रहितो एकीकृत मस्यौदा बनय नहि सकल अछि ।
बिबादक मुख्य बिषयमे सेहो दलसभ गम्भीर भऽ बिमर्श नहि केने अछि ।
संविधान निर्माणमे खासे ध्यान नहि देने सभासदसभ भत्ता लेबय सेहो नहि छोडने छथि । भत्तेके लेल बहुतो सभासदसभ संविधानसभा भवन पहुँच कऽ हस्ताक्षर कऽक घुरैत अछि ।
संविधानसभा सचिवालयके अनुसार २०६५ साल जेठ १५ गतेके पहिल बैसारसँ अखनधरि संविधानसभाके १ सय ९ टा बैसार बैस चुकल अछि । अखनधरि सभासदके तलब भत्तामे मात्रे राज्यकोषसँ १ अर्ब ३६ करोड रुपैयाँ खर्च भ चुकल अछि । सचिवालयके अनुसार सभामुख आ उपसभामुखके तलब भत्तामे मात्रे १ करोड ३७ लाख खर्च भऽ चुकल अछि ।
